ಆದರೆ…

ಜಗತ್ತೇ ನಿನ್ನ ಬಗ್ಗೆ ತಾಳ್ಮೆ ಕಳೆದುಕೊಂಡು ದೂಷಿಸುತ್ತಿರುವಾಗ,

ನೀನು ನಿನ್ನ ಬಗ್ಗೆ ಶಾಂತನಾಗಿರಬಲ್ಲೆಯಾದರೆ;

ಜಗತ್ತೇ ನಿನ್ನನ್ನು ಅನುಮಾನಿಸುತ್ತಿರುವಾಗ,

ಅವರಿಗೆ ಅನುಮಾನಿಸಲು ಬಿಟ್ಟು, ನೀನು ನಿನ್ನನ್ನು ನಂಬಬಲ್ಲೆಯಾದರೆ;

ನೀನು ಕಾಯುವ ತಾಳ್ಮೆ ಹೊಂದಿದ್ದರೂ, ಕಾಯುತ್ತಾ ದಣಿಯದಿದ್ದರೆ;

ನಿನ್ನ ಬಗ್ಗೆ ಬರಿ ಸುಳ್ಳುಗಳೇ ಹರಡಿದ್ದರೂ, ನೀನು ಇನ್ನೊಬ್ಬರ ಬಗ್ಗೆ ಸುಳ್ಳು ಹರಡುತ್ತಿಲ್ಲವಾದರೆ;

ನಿನ್ನ ಬಗ್ಗೆ ದ್ವೇಷ ತುಂಬಿದ್ದರೂ, ನೀನು ಯಾರನ್ನೂ ದ್ವೇಷಿಸುವುದಿಲ್ಲವಾದರೆ;

ಇವೆಲ್ಲರ ನಂತರವೂ ತುಂಬಾ ಒಳ್ಳೆಯವನ ಹಾಗೆ ಕಾಣದೆ,

ತುಂಬಾ ಜಾಣನ ಹಾಗೆ ಮಾತನಾಡದೇ ಇರಬಲ್ಲೆಯಾದರೆ;

ನೀನು ಕನಸುಗಳನ್ನು ಕಾಣಬಲ್ಲೆಯಾದರೆ,

ಮತ್ತು ಬರಿ ಕನಸುಗಳಿಗೆ ನಿನ್ನನ್ನು ಆಳಲು ಬಿಡದಿದ್ದರೆ;

ನೀನು ಯೋಚಿಸಬಲ್ಲೆಯಾದರೆ,

ಮತ್ತು ಯೋಚಿಸುವುದೊಂದನ್ನೇ ಗುರಿಯಾಸಿಕೊಳ್ಳದಿದ್ದರೆ;

ನೀನು ವಿಜಯ ಮತ್ತು ವಿಪತ್ತುಗಳೆರಡನ್ನೂ ಕಂಡು,

ಅವೆರಡೂ ಮುಖಗಳನ್ನು ಒಂದೇ ರೀತಿ ಸ್ವೀಕರಿಸಬಲ್ಲೆಯಾದರೆ;

ನೀ ಆಡಿದ ಸತ್ಯದ ಮಾತೊಂದು ಗಿರಕಿ ಹೊಡೆದು, ವಂಚಕರಿಂದ ತಿರುಚಲ್ಪಟ್ಟು,

ಸುಳ್ಳೆಂದು ನಿನ್ನ ಬಳಿ ಬಂದು ನಿಂತಾಗ ಅದನ್ನು ಎದುರಿಸಬಲ್ಲೆಯಾದರೆ;

ಬದುಕನ್ನೇ ಮುಡುಪಿಟ್ಟು ಕಟ್ಟಿದ ಕನಸೊಂದು ಕಣ್ಮುಂದೆಯೇ ಮುರಿದು ಬೀಳುತ್ತಿರುವಾಗ,

ಬೀಳುವುದನ್ನು ನೋಡುತ್ತಲೇ ಮುರಿದ ಕನಸುಳನ್ನೆಲ್ಲ

ಜೋಡಿಸಿ ಮತ್ತೆ ಕಟ್ಟಲು ಅಣಿಯಾಗುತ್ತಿಯೆಂದಾದರೆ;

ನಿನ್ನ ಗೆಲುವುಗಳನ್ನೆಲ್ಲ ರಾಶಿಮಾಡಿ, ಗುಡಿಸಿ, ಗಾಳಿಗೆ ತೂರಬಲ್ಲೆಯಾದರೆ;

ಕಳೆದುಕೊಂಡದ್ದರೆ ಬಗ್ಗೆ ಉಸಿರೆತ್ತದೆ, ಮತ್ತೆ ಮೊದಲಿಂದ ಆರಂಭಿಸುವೆಯಾದರೆ;

ನಿನ್ನೊಳಗೆ ಉತ್ಸಾಹ ಸತ್ತಿದೆ ಅನಿಸಿದಾಗಲೂ, ಹೃದಯ, ನರ-ನಾಡಿಗಳನ್ನು

ಮತ್ತೆ ಸಿದ್ಧಗೊಳಿಸಿ ಹೋರಾಡಲು ಅಣಿಯಾಗುತ್ತಿ ಎಂದಾದರೆ;

‘ಸೋಲಬೇಡ, ನಿಲ್ಲು’ ಎನ್ನುವ ಆತ್ಮಚೈತನ್ಯ ಹೊರತುಪಡಿಸಿ

ನಿನ್ನಲ್ಲಿ ಏನೂ ಇಲ್ಲದಿದ್ದಾಗಲೂ, ಗೆಲ್ಲಲು ಹೊರಡುವೆಯಾದರೆ;

ಜನಸಾಗರದ ಮಧ್ಯೆಯೂ ನೀನು ನಿನ್ನತನ ಕಾಪಾಡಿಕೊಳ್ಳುವೆಯಾದರೆ;

ರಾಜರೊಂದಿಗೆ ಬದುಕಿಯೂ, ಸಾಮಾನ್ಯರ ಸಂಬಂಧ ಕಡಿದುಕೊಳ್ಳುವುದಿಲ್ಲವಾದರೆ,

ಶತೃಗಳಾಗಲೀ, ಮಿತ್ರರಾಗಲಿ ನಿನ್ನನ್ನು ನೋಯಿಸಲು ಸಾಧ್ಯವಿಲ್ಲವೆಂದಾದರೆ,

ನಿನಗೆ ಜಗತ್ತೇ ಸಮಾನವಾಗಿ ಕಂಡು, ಅದರಲ್ಲಿ ಯಾರೂ ಹೆಚ್ಚು ಸಮಾನರಾಗದಿದ್ದರೆ,

ನಿರ್ದಯಿ ನಿಮಿಷವನ್ನು ಅರವತ್ತು ಸಮಾನ ಸೆಕೆಂಡುಗಳಾಗಿ ಜೀವಿಸಬಲ್ಲೆಯಾದರೆ…

ನಿನ್ನದೇ ಈ ಭುವನ ಮತ್ತು ಅದರಲ್ಲಿರುವ ಪ್ರತಿಯೊಂದೂ;

ಹೆಚ್ಚೇನು? ನೀನೇ ಈ ಭುವನದ ಪ್ರೀತಿಯ ಮಗನು ನನ್ನ ಮಗುವೇ!

ಮೂಲ: ರುಡ್ಯಾರ್ಡ್ ಕಿಪ್ಲಿಂಗ್ ‘ಇಫ್’

ಕನ್ನಡಕ್ಕೆ: ಪರಶುರಾಮ ನಾಗೋಜಿ